Олон улсын сагсан бөмбөг эргээд ирлээ

Тун удахгүй эхлэх байсан тэмцээний хуваарьт өөрчлөлт орж, арван нэгдүгээр сард болохоор болсон тухай Монголын сагсан бөмбөгийн холбооны ерөнхий нарийн бичиг С.Төгсжаргал мэдэгдлээ.


Сүүлийн жилүүдэд 3×3 сагсан бөмбөгийн төрөл манай улсад төдийгүй, дэлхий дахинд хурдацтай тэлж, хөгжсөөр байна. Үүний үр дүн Монгол улс мэргэжлийн түвшний олон багтай болж, олон улсын тэмцээнийг эх орондоо зохион байгуулахын зэрэгцээ, зочлон оролцсоор байгаа билээ.

Түүгээр ч зогсохгүй Монгол улс анх удаагаа олимпын наадамд сагсан бөмбөгийн төрлөөр оролцсон гайхамшигтай түүхийг бичиж амжаад байгаа юм.

Тэгвэл урт хугацаанд олон улсын сагсан бөмбөгийн холбооны тэмцээн уралдаанд оролцох эрхгүй болж, хоригт байсан он жилүүд улиран одож, шинэчлэгдэн нэгдсэн холбооныхоо хамтаар тун удахгүй олон улсын тэмцээнд шигшээ багаа сойхоор болсон баяртай мэдээ байна.

Тодруулбал 2025 онд болох Азийн цомын тэмцээний урьдчилсан шатны тоглолтууд азтай ч гэмээр тохиолоор манай эх оронд ирэх сарын эхээр болох гэж байна.

Тоглолтын хуваарь

Одоогоор 14 тоглогчийг нэгдсэн бэлтгэл дуудаад байгаа бол эцсийн бүрэлдэхүүнд 12 тоглогчийг сонгож үлдээх амаргүй шийдвэрийг шигшээ багийн дасгалжуулагч Ч.Ижилболд дасгалжуулагч болон түүний баг гаргана.

Олон жил олон улсын тэмцээний бараа хараагүй, шигшээ багаа үзээгүй хөгжөөн дэмжигчид сэтгэл догдлон хүлээсээр. Ш.Энхийн-Од, Н.Батбаяр, Д.Баясгалан зэрэг олон улсад туршлага хуримтлуулж яваа залуус, Т.Санчир, Б.Билгүүн, Г.Баттөр зэрэг туршлагатай тоглогчид болон монголын лигийн залуу үеийн төлөөллөөс харахад сагсан бөмбөгийн шигшээ багийн ойрын жилүүдийн ирээдүй гэрэлтэй харагдана.

Тэмцээн Мөсөн өргөө цогцолборт болох бөгөөд тасалбарыг онлайнаар худалдаж авах юм байна. ТАСАЛБАР АВАХ

Бусдадаа хэлэх үү дээ!?